உதயநிதி ஸ்டாலினுக்கு, முதலமைச்சர் மு.க.ஸ்டாலின் ஒரு முக்கிய கண்டிஷன் போட்டுள்ளதாக தகவல் வெளியாகி உள்ளது.

தமிழகத்தில், கடந்த 2021 ஆம் ஆண்டு நடைபெற்ற சட்டப்பேரவைத் தேர்தலில், திமுக தலைமையிலான மதச்சார்பற்ற முற்போக்குக் கூட்டணி அமோக வெற்றி பெற்றது. தொடர்ந்து, தமிழக முதலமைச்சராக, முதன் முறையாக, கடந்த ஆண்டு மே மாதம் 7 ஆம் தேதி, திமுக தலைவர் மு.க.ஸ்டாலின் பதவி ஏற்றுக் கொண்டார். 

அப்போது, அவரது தலைமையிலான அமைச்சரவையில், திமுக இளைஞரணி செயலாளரும், திருவல்லிக்கேணி – சேப்பாக்கம் தொகுதி உறுப்பினரும், அவரது மகனுமான உதயநிதி ஸ்டாலின் இடம் பெறுவார் என எதிர்பார்க்கப்பட்டது. எனினும், அமைச்சரவையில், தனது மகன் உதயநிதி ஸ்டாலினுக்கு, முதலமைச்சர் மு.க.ஸ்டாலின் இடம் அளிக்கவில்லை.

இதற்கிடையே, உதயநிதி ஸ்டாலின், அமைச்சராக வேண்டும் என, பள்ளிக் கல்வித் துறை அமைச்சரும், அவரது நெருங்கிய நண்பருமான அன்பில் மகேஷ் பொய்யாமொழி முதல் ஆளாக குரல் கொடுக்க, அனைத்து அமைச்சர்களும் அதை முன்மொழியத் தொடங்கினர். ஒரு சில அமைச்சர்களோ, உதயநிதி ஸ்டாலினை, துணை முதலமைச்சராக்க வேண்டும் என, வலியுறுத்தினர்.

தமிழகத்தில், முதலமைச்சர் மு.க.ஸ்டாலின் தலைமையிலான திமுக அரசு அமைந்து ஓராண்டு நிறைவடைந்துள்ள நிலையில், அமைச்சரவை மாற்றத்திற்கான வேலைகள் படு தீவிரமாக நடைபெற்று வருகின்றன. உதயநிதி ஸ்டாலின் அமைச்சர் ஆக உள்ளார் என்ற தகவல் கிட்டத்தட்ட உறுதி செய்யப்பட்டு உள்ள நிலையில், மேலும் சில, இளம் எம்எல்ஏக்களை அமைச்சராக்கும் வேலைகளும் நடைபெற்று வருகின்றன. 

இந்நிலையில், முதலமைச்சர் மு.க.ஸ்டாலின், எம்எல்ஏ உதயநிதி ஸ்டாலினுக்கு, ஒரு முக்கிய உத்தரவு பிறப்பித்து உள்ளதாக தகவல் வெளியாகி உள்ளது. அதாவது, தற்போது ஒப்பந்தம் ஆகி உள்ள அனைத்து திரைப்படங்களை உடனடியாக நடித்து கொடுத்து முடிக்கும்படி, உதயநிதி ஸ்டாலினுக்கு, முதலமைச்சர் ஸ்டாலின் அறிவுரை வழங்கி உள்ளதாகக் கூறப்படுகிறது. இதன்படி பார்த்தால், உதயநிதி ஸ்டாலின் அமைச்சரானால், படங்களில் நடிக்க மாட்டார் என்பது தெரிகிறது.