முன்னணி ஓடிடி நிறுவனமான நெட்பிளிக்ஸ் தனது ஷோக்கள் ஊழியர்களுக்கு பிடிக்கவில்லை என்றால் தாரளமாக வேலையில் இருந்து வெளியேறலாம் என தெரிவித்துள்ளது. இதற்கு டெஸ்லா நிறுவனத்தின் தலைமை அதிகாரி எலான் மஸ்க் பாராட்டு தெரிவித்துள்ளார்.

ஓடிடி நிறுவனமான நெட்பிளிக்ஸ் உலகம் முழுவதும் திரைப்படங்கள், வெப்சீரிஸ் உள்ளிட்ட ஷோக்களை ஸ்ட்ரீம் செய்து வருகிறது. இந்நிலையில், படைப்புச் சுதந்திரத்தை ஆதரிக்கவும், புதிய படைப்புகள், எதிர் கருத்துகளை வரவேற்கவும் நெட்பிளிக்ஸ் ஒரு முக்கிய அறிவிப்பை வெளியிட்டுள்ளது.

அதாவது, நெட்பிளிக்ஸில் ஒளிபரப்பப்படும் ஷோக்கள் ஊழியர்களை புண்படுத்தும் வகையில் இருந்தால் ஊழியர்கள் தாராளமாக வேலையில் இருந்து வெளியேறிக்கொள்ளலாம் என நெட்பிளிக்ஸ் நிறுவனம் தெரிவித்துள்ளது. இதனால் நெட்பிளிக்ஸ் ஊழியர்கள் மத்தியில் பரபரப்பு உருவாகியுள்ளது.

இதுகுறித்து ஊழியர்களுக்கு நெட்பிளிக்ஸ் அனுப்பியுள்ள மெமோவில், நெட்பிளிக்ஸ் உலகம் முழுவதும் படைப்புச் சுதந்திரத்தை ஆதரிப்பதாகவும், பல்தரப்பட்ட பன்மைத்துவம் கொண்ட ஷோக்கள் நெட்பிளிக்ஸில் வர வேண்டும் எனவும் தெரிவித்துள்ளது.

எதிர் கருத்துகளை கொண்ட, பன்மைத்துவம் வாய்ந்த படைப்புகளை சகித்துக்கொள்ள முடியாத ஊழியர்கள் வேலையில் இருந்து வெளியேறலாம் என்று நெட்பிளிக்ஸ் தெரிவித்துள்ளது. இதற்கு, உலகின் மிகப்பெரிய பணக்காரரான எலான் மஸ்க் பாராட்டு தெரிவித்துள்ளார். நெட்பிளிக்ஸ் செய்த நடவடிக்கை சரியானது என எலான் மஸ்க் தனது ட்விட்டர் பக்கத்தில் தெரிவித்துள்ளார்.