சிம்பு ரசிகர்களின் மிக நீண்ட எதிர்பார்ப்பிற்கு மத்தியில் நேற்றைய தினம் வெளியாகியுள்ள படம் ‘வெந்து தணிந்தது காடு’. ‘மாநாடு’ படத்தின் பிரம்மாண்ட கம்பேக்கிற்கு பிறகு கெளதம் மேனன் இயக்கத்தில் இந்தப்படத்தில் நடித்துள்ளார் சிம்பு. இந்நிலையில் நேற்று வெளியாகியுள்ள இந்தப்படம் ரசிகர்கள் மத்தியில் அமோக வரவேற்பினை பெற்று வருகிறது.

விண்ணைத்தாண்டி வருவாயா, அச்சம் என்பது மடமையடா படத்திற்கு பிறகு சிம்பு, கெளதம் மேனன் மூன்றாவது முறையாக ‘வெந்து தணிந்தது காடு’ படத்தில் இணைந்தது ரசிகர்கள் மத்தியில் மிகப்பெரிய எதிர்பார்ப்பினை கிளப்பியிருந்தது. வேல்ஸ் பிலிம்ஸ் நிறுவனம் சார்பாக ஐசரி கணேஷ் தயாரித்துள்ள இந்தப்படத்திற்கு இசைப்புயல் ஏ.ஆர்.ரஹ்மான் இசையமைத்துள்ளார்.

‘வெந்து தணிந்தது காடு’ படத்தில் முத்து என்ற முற்றிலும் வித்தியாசமான கதாபாத்திரத்தில் நடித்துள்ளார் சிம்பு. சித்தி இட்ஞானி, ராதிகா சரத்குமார் உள்ளிட்டோர் முக்கிய கதாபாத்திரத்தில் நடித்துள்ளனர். படம் வேற லெவலில் இருப்பதாகவும், சிம்புவின் நடிப்பு மிரட்டலாக இருப்பதாகவும், கெளதம் இயக்கத்தில் இந்தப்படம் வித்தியாசமாக இருப்பதாகவும் ரசிகர்கள் கமெண்ட் அடித்து வருகின்றனர்.

இந்நிலையில் உதயநிதியின் ரெட் ஜெயண்ட் மூவீஸ் நிறுவனம் வெளியிட்ட ‘வெந்து தணிந்தது காடு’ படத்தின் முதல்நாள் வசூல் குறித்த தகவல்கள் வெளியாகியுள்ளது. அதன்படி இப்படம் முதல் நாளில் உலகளவில் ரூ.10 கோடிக்கு மேல் வசூலித்துள்ளதாக கூறப்படுகிறது. இந்தியாவில் மட்டும் இப்படம் 7.4 கோடிக்கு மேல் வசூலித்துள்ளதாக தகவல்கள் வெளியாகியுள்ளன.

சிம்பு நடிப்பில் வெளியான ‘மாநாடு’ படம் முதல் நாளில் 8.5 கோடி வசூலித்த நிலையில் தற்போது ‘வெந்து தணிந்தது காடு’ படம் அந்த சாதனையை முறியடித்து 10 கோடிக்கு மேல் கூறப்படுகிறது. இந்த தகவல் ரசிகர்கள் மத்தியில் கொண்டாட்டத்தை ஏற்படுத்தியுள்ளது.