மத்திய பிரதேசத்தில் சிறுநீர் கழித்த சம்பவம் தொடர்பான சர்ச்சைக்கு மத்தியில், முதற்கட்ட விசாரணையில் அதிகாரிகளிடம் பொய் சொன்னதாக பாதிக்கப்பட்ட தஷ்மத் ராவத் தெரிவித்துள்ளார்.

பெரும் பரபரப்பை ஏற்படுத்திய வீடியோ 

கடந்த வாரம், மத்தியப் பிரதேசத்தின் சித்தி மாவட்டத்தில் பழங்குடியின சமூகத்தைச் சேர்ந்த நபர் முகத்தில் சிறுநீர் கழிக்கப்பட்ட வீடியோ வெளியாகி பெரும் பரபரப்பை ஏற்படுத்தியது.

குற்றம் சாட்டப்பட்ட பிரவேஷ் சுக்லா மறுநாள் கைது செய்யப்பட்டு கடுமையான தேசிய பாதுகாப்புச் சட்டத்தின் கீழ் வழக்குப் பதிவு செய்யப்பட்டார்.

கலெக்டரிடம் பலமுறை பொய் சொன்னேன்

சமீபத்திய வீடியோ ஒன்றில் இந்த சம்பவம் குறித்து பேசிய தஷ்மத் ராவத், துஷ்பிரயோகம் செய்யப்பட்ட நபர் நான் இல்லை என்று கலெக்டரிடம் பொய் சொன்னதாக கூறினார்.

“இந்த சம்பவம் 2020-ல் நடந்தது. நான் குடிபோதையில் இருந்தேன், எனக்கு எதுவும் புரியவில்லை. என் மீது சிறுநீர் கழித்தவரை நான் பார்க்கவே இல்லை’ என தஷ்மத் ராவத் கூறினார்.

“வீடியோ வைரலானதும், நான் காவல் நிலையத்துக்கும், பிறகு கலெக்டரிடமும் அழைத்துச் செல்லப்பட்டேன். அந்த வீடியோவில் மானபங்கம் செய்யப்பட்டது நான் அல்ல என்று பலமுறை பொய் சொன்னேன். ஆனால் குற்றம் சாட்டப்பட்ட பிரவேஷ் சுக்லாவே குற்றத்தை ஒப்புக்கொண்டபோது, ​​நான் அதை ஏற்றுக்கொண்டேன்” என்று கூறியுள்ளார்.

தவறை உணர்ந்துவிட்டார்., விடுவிக்குமாறு கோரிக்கை

தஷ்மத் ராவத், இந்த சம்பவத்தில் தொடர்புடைய குற்றவாளிகளை விடுவிக்குமாறு மாநில அரசுக்கு கோரிக்கை விடுத்திருந்தார், மேலும் குற்றம் சாட்டப்பட்டவர் தனது தவறை உணர்ந்துவிட்டார் என கூறியுள்ளார்.

“இப்போது அரசுக்கு எனது கோரிக்கை, பிரவேஷ் சுக்லாவை விடுதலை செய்ய வேண்டும் என்பதுதான். கடந்த காலத்தில் என்ன நடந்தாலும், அவர் தனது தவறை உணர்ந்துவிட்டார்’ என்று ராவத் கூறினார்.

சர்ச்சை- தஷ்மத் ரவுத் விளக்கம்

முதல்வர் சிவராஜ் சிங் சவுகான் கால்களைக் கழுவும் வைரலான வீடியோவில் உள்ள நபர் பாதிக்கப்பட்டவர் அல்ல என்று கூறப்படும் நிலையில், தஷ்மத் ரவுத் இந்த விளக்கத்தை அளித்துள்ளார்.

இந்த வீடியோ வெளியானதும், பாதிக்கப்பட்டவருக்கு மாநில அரசு ரூ.5 லட்சம் நிதியுதவி அளித்ததுடன், அவரது வீட்டைக் கட்டுவதற்கு கூடுதலாக ரூ.1.5 லட்சம் வழங்கியது.

இதற்கிடையில், குற்றம் சாட்டப்பட்ட பிரவேஷ் சுக்லா, பொலிஸ் காவலில் உள்ளார், மேலும் அவர் மீது தேசிய பாதுகாப்புச் சட்டம் தவிர, இந்திய தண்டனைச் சட்டம் மற்றும் எஸ்சி/எஸ்டி (வன்கொடுமை தடுப்பு) சட்டத்தின் பல்வேறு பிரிவுகளின் கீழ் குற்றம் சாட்டப்பட்டுள்ளது. சித்தியில் சுக்லாவுக்குச் சொந்தமான வீட்டின் சட்டவிரோதப் பகுதியும் கடந்த வாரம் இடிக்கப்பட்டது குறிப்பிடத்தக்கது.