நெஞ்சுக்கு நீதி திரைப்படம் இன்று வெளியாகியுள்ள நிலையில் உதயநிதிக்கு சிறப்பு பட்டங்கள் கொடுத்து அவரது ஆதரவாளர்கள் போஸ்டர் 

தமிழகத்தில் ஆளுங்கட்சியாக இருக்கும் திமுகவில் முதல்வர் மு.க.ஸ்டாலினுக்கு அடுத்தபடியாக பெரிதும் கொண்டாடப்பட்டு வருபவர் உதயநிதி ஸ்டாலின். இதனை அமைச்சர்கள், எம்.எல்.ஏக்கள், மூத்த தலைவர்கள் என பலரின் செயல்பாடுகள் மூலம் தெரிந்து கொள்ளலாம். சட்டப்பேரவையில் கூட முதல்வரின் பின்னால் தெளிவாக தெரியும்படியான இருக்கை வழங்கப்பட்டிருப்பது கவனிக்கத்தக்கது. சேப்பாக்கம் – திருவல்லிக்கேணி சட்டமன்ற தொகுதி எம்.எல்.ஏவாக இருக்கும் உதயநிதி ஸ்டாலின், தனது தொகுதியை மட்டுமின்றி பல்வேறு தொகுதிகளிலும் களப்பணி ஆற்றி வருகிறார்.

இதற்கிடையில் திரைப்படங்களிலும் கவனம் செலுத்தி கொண்டிருக்கிறார். அந்த வகையில் அருண்ராஜா காமராஜ் இயக்கத்தில் திரையரங்குகளில் இன்று வெளியாகியுள்ள திரைப்படம் ‘நெஞ்சுக்கு நீதி’. இது 2020ஆம் ஆண்டு இந்தியில் வெளியாகி வெற்றியடைந்த ’ஆர்டிக்கிள் 15’ என்ற படத்தில் அதிகாரப்பூர்வ ரீமேக் ஆகும். இப்படத்தில் உதயநிதி ஸ்டாலின் உடன் டன்யா ரவிச்சந்திரன்,

ஆரி அர்ஜுனன், ஷிவானி ராஜசேகர், ஷிவாங்கி, இளவரசு, மயில்சாமி உள்ளிட்டோர் நடித்துள்ளனர். இன்றைய தினம் நெஞ்சுக்கு நீதி திரைப்படம் வெளியாவதை ஒட்டி, தமிழகம் முழுவதும் உள்ள திரையரங்குகளில் சிறப்பு ஏற்பாடுகள் செய்யப்பட்டுள்ளன. முக்கிய நகரங்களில் மேள, தாளங்கள் உடன் ஆட்டம், பாட்டம் என உதயநிதி ரசிகர்கள் கொண்டாட்டத்தில் ஈடுபட்டனர்.

உதயநிதிக்கு சிறப்பு பட்டப் பெயர்கள் கொடுத்து பல்வேறு இடங்களில் போஸ்டர்கள் ஒட்டி மகிழ்ச்சியை வெளிப்படுத்தியுள்ளனர். அதில் கோவை மாநகரில் ஒட்டப்பட்டுள்ள போஸ்டர்கள் பெரிதும் கவனத்தை ஈர்த்துள்ளன. அதில், ”கலைஞர் ஐயாவின் பராசக்தி”, “தளபதியாரின் ஒரே ரத்தம்” என்ற வசனத்துடன் ”சமூக நீதி பேசும் சின்னவரின் நெஞ்சுக்கு நீதி” எனக் குறிப்பிடப்பட்டுள்ளது.

இதனை கோவை மாநகர் மற்றும் மாவட்ட உதயநிதி ஸ்டாலின் ரசிகர் நற்பணி மன்றம் சார்பில் அச்சிடப்பட்டிருப்பதாக கூறப்பட்டுள்ளது. அதுமட்டுமின்றி 73வது வார்டு மாமன்ற உறுப்பினரும், கோவை மாநகராட்சி நகரமைப்புக் குழு தலைவருமான சோமு என்கிற த.சந்தோஷ் அவர்களின் பெயர் இடம்பெற்றுள்ளது.

உதயநிதி ஸ்டாலினின் நெஞ்சுக்கு நீதி திரைப்படம் வெற்றி பெற வாழ்த்துகளை தெரிவித்துக் கொள்வதாக அச்சிடப்பட்டுள்ளது. வழக்கமாக மதுரையில் தான் போஸ்டர் கலாச்சாரமும், அரசியல் கட்சி தலைவர்களுக்கு அடைமொழி, பட்டங்கள் கொடுக்கும் பழக்கமும் அதிகமாக காணப்படும். இம்முறையில் உதயநிதி விஷயத்தில் மதுரைக்கு டஃப் கொடுத்து கோவை அசத்தலாக போஸ்டர் ஒட்டியிருப்பதாக திமுக உடன்பிறப்புகள் மகிழ்ச்சியில் திளைத்து வருகின்றனர்.