பட விழா ஒன்றில் மேடையிலே தயாரிப்பாளர் கே. ராஜன், நடிகர் சென்ட்ராயன் இடையே வாக்குவாதம் நிகழ்ந்துள்ள சம்பவம் பரபரப்பை கிளப்பியுள்ளது.

யோகிபாபு, நடன இயக்குநர் தினேஷ் மாஸ்டர் நடிப்பில் உருவாகியுள்ள படம் ‘லோக்கல் சரக்கு’. இப்படத்தை சுறா, அழகர் மலை போன்ற படங்களை இயக்கிய ராஜ்குமார் இயக்க, உபாசனா, இமான் அண்ணாச்சி, சென்ட்ராயன் உள்ளிட்டோர் முக்கிய கதாபாத்திரங்களில் நடித்துள்ளனர்.

‘டிஸ்கவர் ஸ்டுடியோஸ்’ சார்பில் இப்படத்தை தயாரிக்கும் சுவாமிநாதன் ராஜேஷ், படத்திற்கு இசையும் அமைத்திருக்கிறார். இந்தப்படத்தின் ட்ரைலர் மற்றும் இசை வெளியீட்டு விழாவில் தயாரிப்பாளர் கே. ராஜன், நடிகர் சென்ட்ராயன் இடையே வாக்குவாதம் நிகழ்ந்துள்ளது பரபரப்பை கிளப்பியுள்ளது.

முன்னதாக இவ்விழாவில் பேசிய கே.ராஜன், “தம்பி ராஜேஷுக்கு ஒன்று சொல்லிக் கொள்கிறேன். நீங்கள் இப்போது தயாரிப்பாளராகவும், இசையமைப்பாளராகவும் ஆகிவிட்டீர்கள். ஆனால் இதற்கு அடுத்து நீங்கள் படம் தயாரிக்கக் கூடாது. முதலில் 5 அல்லது 10 படத்துக்கு இசையமைத்து பெரிய ஆள வாங்க. நிறைய சம்பாதியுங்கள்” என்று பேசிக்கொண்டிருந்தார்.

இதனிடையில் குறுக்கிட்ட சென்ட்ராயன், “எங்க தயாரிப்பாளர், அவர் எங்க முதலாளி, அவரு படம் பண்ணத்தான் எங்களுக்கு வேலை கிடைக்கும் என்று கூறினார். இதை பார்த்து ஆவேசமடைந்த தயாரிப்பாளர் கே. ராஜன், “போய் உட்காரு, நாங்க வேற வேலை வாங்கி தருகிறோம். ஆனால் அவரை வேலை இல்லாமல் ஆக்கிடாதீங்க. உட்காரு தம்பி, உங்க வேலைக்காக நாங்கள் வெளியே போகணுமா. எங்களுக்கு தெரியும். பெருசா எதிர்ப்பு தெரிவிக்க வந்துட்டாரு.

நான் என்ன சொன்னேன், இசையமைப்பாளராக இருந்து படமெடுக்க வந்துட்ட. ஆனால் படம் எடுக்கிறதில் இருக்கும் டார்ச்சர் எங்களுக்கு மட்டும் தான் தெரியும். அதனால்தான் நல்ல சம்பாதிச்சுட்டு படம் எடுக்க வாங்க, அப்போதான் கடன் பிரச்சனையை சமாளிக்க முடியும் என்று சொன்னேன். ஆனால் நீங்க இப்படி இடையில் புகுந்து டிஸ்டர்ப் பண்றீங்க, அப்படி எல்லாம் பண்ணக்கூடாது. ஏன்னா நான் பலபேரை டிஸ்டர்ப் பண்றவன்” என தெரிவித்துள்ளார். இந்த வீடியோ இணையத்தில் வெளியாகி பரபரப்பை கிளப்பியுள்ளது