முத்தையா இயக்கத்தில் நடிகர் கார்த்தி இரண்டாவது முறையாக இணைந்துள்ள படம் விருமன். இந்தப் படத்தில் கார்த்திக்கு ஜோடியாக அதிதி ஷங்கர் நடித்துள்ளார். பிரகாஷ் ராஜ், ராஜ்கிரண், வடிவுக்கரசி, சரண்யா பொன்வண்ணன், சூரி என பல முக்கிய நட்சத்திரங்கள் நடித்துள்ளனர்.

சூர்யாவின் 2டி எண்டெர்டெய்ன்மென்ட் தயாரித்துள்ள இந்தப் படம் நேற்று வெளியானது. கிராமத்து மண் வாசனையில் படம் பட்டையை கிளப்புவதாக முதல் நாள் முதல் காட்சியில் இருந்தே பாஸிட்டிவான விமர்சனங்கள் குவிய தொடங்கிவிட்டன. படத்தில் பெரிதாக குறை என எதுவும் இல்லை என்றும் அறிமுக நாயகியான அதிதியே பக்கவாக நடித்துள்ளார் என்றும் ரசிகர்கள் கருத்து தெரிவித்து வருகின்றனர்.

அனுபவ நடிப்பு

படத்தில் தங்களுக்கு என கொடுக்கப்பட்ட கதாப்பாத்திரத்தை அனைவருமே சிறப்பாக செய்துள்ளனர் என்ற விமர்சனமே அதிகம் பகிரப்பட்டு வருகிறது. குறிப்பாக கார்த்தி, பிரகாஷ் ராஜ் மற்றும் ராஜ்கிரண் ஆகியோரின் அனுபவமான நடிப்பு படத்திற்கு கூடுதல் பலமாக அமைந்துள்ளது. அதில் பிரகாஷ் ராஜின் நடிப்பு வேற லெவலில் உள்ளது.

வில்லன் கதாப்பாத்திரம்

நீண்ட இடைவெளிக்கு பிறகு தமிழ் சினிமாவில் வில்லன் கதாப்பாத்திரத்தில் நடித்துள்ளார் பிரகாஷ் ராஜ். பிரகாஷ் ராஜின் 4 மகன்களில் ஒருவர் கார்த்தி. தாசில்தாரான பிரகாஷ் ராஜ், வேலைக்கார பெண்ணுடன் தொடர்பு வைத்திருப்பதை அறிந்து அவரது மனைவியான சரண்யா பொன்வண்ணன் தற்கொலை செய்துகொள்கிறார்.

பழிவாங்க துடிக்கும் மகன்

அங்குதான் அப்பாவான பிரகாஷ் ராஜுக்கும் மகனான கார்த்திக்கும் ஆரம்பிக்கிறது மோதல். அம்மாவின் மரணத்திற்கு அப்பாதான் காரணம் என சிறு வயதிலேயே அப்பாவை பிரிந்து தாய் மாமாவின் அரவணைப்பில் வளர்கிறார். சிறு வயதில் இருந்தே அப்பா மீது வெறுப்பில் இருக்கும் கார்த்தி வளர்ந்த பிறகும் அப்பாவை பழிவாங்க துடிக்கிறார்.

இதில் இருவருமே போட்டி போட்டுக்கொண்டு நடித்துள்ளனர். பிரகாஷ் ராஜ் தனது ஒவ்வொரு காட்சியிலும் மிரட்டியிருக்கிறார். தமிழ் சினிமாவின் மோசமான மற்றும் கொடூரமான அப்பாக்களில் ஒருவராக மீண்டும் முத்திரை பதித்துள்ளார் பிரகாஷ் ராஜ். பிரகாஷ் ராஜின் நடிப்பை பார்த்த ரசிகர்கள் மிரட்டலான நடிப்பு, தெறிக்க விட்டுட்டாரு என புகழ்ந்து வருகின்றனர்.