பிரபல தொழிலாளர் லெஜண்ட் சரவணன் நடித்த ‘லெஜண்ட்’ என்ற திரைப்படம் கடமை 2022 ஆம் ஆண்டு வெளியான நிலையில் அவரது இரண்டாம் படம் குறித்த அறிவிப்பு விரைவில் வெளியாகும் என்று கூறப்பட்டது.

சிவகார்த்திகேயன் நடித்த ’எதிர்நீச்சல்’ தனுஷ் நடித்த ’கொடி’ உட்பட சில படங்களை இயக்கிய இயக்குனர் துரை செந்தில்குமார் தான் லெஜண்ட் சரவணன் நடிக்க இருக்கும் அடுத்த படத்தை இயக்க இருப்பதாகவும், இந்த படத்தின் ஆரம்பகட்ட பணிகள் தொடங்கி விட்டதாகவும் கூறப்பட்டது.

இந்த நிலையில் தற்போது வந்துள்ள தகவலின்படி லெஜண்ட் சரவணன் நடிக்கும் இரண்டாவது படத்தின் லுக் டெஸ்ட் தற்போது சென்னையில் உள்ள தனியார் ஸ்டூடியோவில் நடைபெற்று வருவதாகவும் இதனை அடுத்து ஏப்ரல் மாதம் பூஜையுடன் கூடிய படப்பிடிப்பு தொடங்கும் என்றும் கூறப்படுகிறது. மேலும் இந்த படம் கார் சேஸிங் மற்றும் ஆக்சன் கதையம்சம் கொண்டது என்றும் ஆரம்பம் முதல் கடைசி வரை விறுவிறுப்பாக இருக்கும் என்றும் தெரிகிறது.

மேலும் முதல் படம் போலவே இரண்டாவது படத்தையும் பிரமாண்டமாக தயாரிக்க லெஜண்ட் சரவணன் முடிவு செய்துள்ளதாகவும் இந்த படம் நிச்சயம் ரசிகர்கள் மத்தியில் நல்ல வரவேற்பு பெரும் என்றும் கூறப்படுகிறது.

இயக்குனர் துரை செந்தில்குமார் தற்போது தான் இயக்கி முடித்துள்ள ’கருடன்’ படத்தின் தொழில்நுட்ப பணியில் பிஸியாக இருக்கும் நிலையில் அந்த பணியை முடித்தவுடன் லெஜண்ட் சரவணன் படத்தின் படப்பிடிப்பை தொடங்கி விடுவார் என்று எதிர்பார்க்கப்படுகிறது.