தான் உயிரியல் ரீதியாக பிறக்கவில்லை, நான் கடவுளால் நேரடியாக அனுப்பப்பட்டேன் என்று பேசி தனது தாயை மோடி 30 வினாடிகளில் அவமானப்படுத்தியுள்ளார் என்று நடிகை காயத்ரி ரகுராம் கூறியுள்ளார். 

மோடி பேசியது

ஒடிசா மாநிலத்தில் தேர்தல் பிரச்சாரத்தில் ஈடுபட்டு வரும் பிரதமர் நரேந்திர மோடி செய்தி நிறுவனம் ஒன்றிற்கு பேட்டி அளித்துள்ளார். 

அப்போது அவர் பேசுகையில், “நான் பயலாஜிகலாக பிறந்திருக்க வாய்ப்பில்லை என நம்புகிறேன். கடவுள் தான் என்னை பூமிக்கு அனுப்பியிருக்கிறார். ஏதாவது ஒரு விடயத்தை செய்து முடிக்க வேண்டும் என்று அனுப்பியுள்ளார்.

நான் பெற்றுள்ள ஆற்றல் சாதாரண மனிதன் பெற்றிருக்கும் ஆற்றல் கிடையாது. கடவுளால் மட்டுமே இதை கொடுக்க முடியும்” என்றார்.

காயத்ரி ரகுராம் பதிவு

பிரதமர் மோடியின் இந்த கருத்துக்கு பலரும் பல்வேறு விமர்சனங்களை தெரிவித்து வரும் நிலையில் நடிகை காயத்ரி ரகுராம் தனது கருத்தை தெரிவித்துள்ளார். 

அவர் தனது ட்விட்டர் எக்ஸ் தளத்தில், “”நான் உயிரியல் ரீதியாக பிறக்கவில்லை, ஆனால் நான் கடவுளால் நேரடியாக அனுப்பப்பட்டேன் என்று நான் நம்புகிறேன்”.

தன்னை ‘கடவுளின் அவதாரம்’ என்று வெளிப்படையாக சொல்லிக் கொள்கிறார். அவர் தனது தாயை 30 வினாடிகளில் அவமானப்படுத்தினார். அனைத்தும் அதிகாரத்திற்காக..

காசி விஸ்வநாதரை விட பெரிய ஆண்டவனாக நினைக்கும் மோடி, இப்படிப்பட்ட மனப்பான்மையுடன் வாரணாசியில் வெல்லக் கூடாது. மாறாக இமயமலையில் அமர்ந்து தன்னை கற்பனை செய்து கொண்டு தியானம் செய்ய வேண்டும்” என்று கூறியுள்ளார்.