தமிழ்நாட்டின் நாமக்கல் மாவட்டம், சேந்தமங்கலம் அருகே உள்ள புதன்சந்தை ஜீவா நகரை சேர்ந்தவர் கந்தசாமி (வயது 45) கட்டிட மேஸ்திரி. இவருடைய மனைவி அங்கம்மாள் (40). இவர்களது மகள் சாந்தி செல்வம் (20).
நேற்று முன்தினம் இரவு அங்கம்மாள் தனது மகள் சாந்தியை அழைத்து கொண்டு அதே பகுதியில் உள்ள தனது தாயார் எல்லம்மாள் (65) வீட்டிற்கு சென்றார். அப்போது கந்தசாமி அவரது வீட்டின் வெளியே தனியாக கட்டிலில் தூங்கி கொண்டிருந்தார். அப்போது மர்ம நபர்கள், கந்தசாமியின் மீது பெட்ரோலை ஊற்றி தீ வைத்து விட்டு ஓடி விட்டனர். அக்கம், பக்கத்தினர் அவரை மீட்டு நாமக்கல் அரசு மருத்துவமனையில் சேர்த்தனர். நேற்று காலை சிகிச்சை பலனின்றி கந்தசாமி பரிதாபமாக இறந்தார்.
இந்த கொலை சம்பவம் குறித்து சேந்தமங்கலம் (பொறுப்பு) இன்ஸ்பெக்டர் செல்வராஜ் வழக்குப்பதிவு செய்து கந்தசாமியின் மனைவி அங்கம்மாள், மகள் சாந்தி, மற்றும் எல்லம்மாள் ஆகியோரிடம் துருவி துருவி விசாரனை நடத்தினார். அப்போது, தாங்கள் தான் கந்தசாமியை பெட்ரோல் ஊற்றி எரித்து விட்டு ஓடினோம் என தெரிவித்தனர்.
இதையடுத்து 3 பேரையும் போலீசார் கைது செய்தனர். கைதான அங்கம்மாள், தனது கணவரை எதற்காக கொலை செய்தேன்? என போலீசாரிடம் பரபரப்பு வாக்குமூலம் அளித்துள்ளார். அதன் விபரம் வருமாறு:-
எனது கணவர் கந்தசாமி கொத்தனார் என்பதால் தினமும் கட்டிட வேலைக்கு செல்வது வழக்கம். அவர் வேலை செய்த இடத்தில் சேலத்தை சேர்ந்த சரோஜா என்ற பெண் சித்தாளாக பணிபுரிந்து வந்தார். இவருக்கும், எனது கணவர் கந்தசாமிக்கும் இடையே கள்ளத்தொடர்பு ஏற்பட்டது.
இது பற்றி எனக்கு தெரியவந்தது. நான், எனது கணவரிடம் சரோஜாவுடன் இருக்கும் கள்ளத்தொடர்பை கைவிடுமாறு கூறினேன். ஆனால் அவர் கேட்கவில்லை. கள்ளத்தொடர்பை விட்டு விடுங்கள் என பலமுறை கெஞ்சினேன். அதற்கு அவர் மறுத்து வந்தார்.
மேலும் எனது பெயரில் இருக்கும் சொத்துக்களை கள்ளத்காதலி சரோஜா பெயருக்கு மாற்றி கொடுக்குமாறு கூறி தினமும் என்னிடமும், மகளிடமும் கந்தசாமி தகராறு செய்து வந்தார்.
ஒரு நாள் கந்தசாமி என்னிடம், நான் சரோஜாவுடன் வாழ விரும்புகிறேன் என தெரிவித்தார். இது எனக்கு ஆத்திரத்தை ஏற்படுத்தியது. நானும், மகளும், கந்தசாமியை கொலை செய்ய முடிவு செய்தோம். அதன்படி நேற்று முன்தினம், கட்டிலில் தூங்கிக்கொண்டிருந்த கந்தசாமியை பெட்ரோல் ஊற்றி எரித்துக் கொன்றோம். போலீசார் துருவி, துருவி விசாரணை நடத்தி எங்களை கண்டுபிடித்து விட்டனர்.
இவ்வாறு அவர் வாக்குமூலத்தில் கூறி இருப்பதாக தெரிகிறது.
