விழுப்புரம் மாவட்டம்  கோட்டகுப்பத்தைச் சேர்ந்தவர் ராகவன். இவர் அதே பகுதியைச் சேர்ந்த அருணா  என்ற பெண்ணை கடந்த இரண்டு வருடங்களாக காதலித்து வந்துள்ளார். ராகவன்  மீதும் அவருடைய அண்ணன் மீதும் திருட்டு வழக்குகள் உள்ளதாக கூறப்படுகிறது. இதனால் ராகவனுடன் உள்ள தொடர்பை நிறுத்திக்கொள் என அருணாவை அவரது பெற்றோர் கண்டித்துள்ளனர். ராகவனையும் சந்தித்து மிரட்டியுள்ளனர்.

இதனால் ராகவனின் உயிருக்கு ஆபத்து ஏற்படுமோ என்று பயந்த அவரது தாய் ராகவனை வேலைக்காக ஐதராபாத்துக்கு அனுப்பி வைத்துவிட்டார். அங்கு சென்ற ராகவன் தனது காதலி அருணாவுடன் செல்போனிலும், வாட்சப்பிலும் தொடர்பு கொண்டு பேசி வந்தார். இந்த விவகாரம் அருணாவின் வீட்டுக்கு தெரிந்ததையடுத்து செல்போனை பிடுங்கி வைத்துகொண்டனர். இந்நிலையில் காதலனுடன் தொடர்பு கொள்ளமுடியாமலும், வீட்டை விட்டு எங்கும் செல்ல முடியாமலும் வீட்டு சிறையில் அடைக்கப்பட்டார் அருணா.

மேலும், அவரது பெற்றோர் அருணாவுக்கு வேறிடத்தில் மாப்பிள்ளை பார்க்க தொடங்கினர். இந்த விவகாரம் ஐதராபாத்தில் உள்ள ராகவனுக்கு எப்படியோ தெரிய வர அவர் தனது கையை அறுத்துக்கொண்டு தற்கொலை செய்ய முயற்சித்ததாகவும் கூறப்படுகிறது. இதை அறிந்த அருணா கடும் மன உளைச்சலில் இருந்துள்ளார். இந்நிலையில் கடந்த 21 ஆம் தேதி அருணாவை பெண் பார்க்க மாப்பிளை வீட்டார் வர ஏற்பாடுகள் செய்யப்பட்டுள்ளது.

வாழ்ந்தால் ராகவனுடன்தான் வாழ்வேன் என்ற முடிவில் இருந்த அருணா, வேறு வழியின்றி தனது அறையில் தூக்கிலிட்டு தற்கொலை செய்துகொண்டார். இதையடுத்து அவரது கண்ணீர் அஞ்சலி  போஸ்டரை அருணாவின் உறவுக்கார பெண் ஒருவர் வாட்சப் ஸ்டேட்டஸில் வைத்துள்ளார். அதை பார்த்த ராகவன் கதறி அழுதுள்ளார். அப்போது அவரது அறையில் தங்கியிருந்த நண்பர்கள் ராகவனுக்கு ஆறுதல் கூறிவிட்டு சென்றுள்ளனர்.

எனினும் காதலியின் மரணத்தை சிறிதும் ஏற்றுக்கொள்ள முடியாத மனநிலையில் இருந்த ராகவன் தூக்கிலிட்டு தற்கொலை செய்ய முயற்சித்த போது சக நண்பர்கள் அவரை காப்பாற்றி புதுச்சேரிக்கு அழைத்து வந்துள்ளனர். அப்போது அவருடன் வந்த சஞ்சய் என்ற வாலிபர் அருணாவின் அண்ணனுக்கு தகவல் கூறியுள்ளார். சகோதரியின் தற்கொலைக்கு ராகவன்தான் காரணம் என கடும் கோபத்தில் இருந்த அருணாவின் சகோதரன் மற்றும் தாய் மாமன் குட்டை ரமேஷ் ஆகிய இருவரும் புதுச்சேரி பேருந்து நிலையத்துக்கு வந்தடைந்தனர்.

அப்போது அங்கு வந்தடைந்த ராகவனை சந்தித்த அவர்கள் வாக்கு வாதத்தில் ஈடுபட்டதோடு ராகவனை தங்களது டூ வீலரில் ஏற்றிக்கொண்டு ஆள் நடமாட்டம் இல்லாத இடத்திற்கு அழைத்து சென்றுள்ளனர். புதுச்சேரிக்கு வந்து விட்டதாக கூறிய மகன் இன்னும் வீட்டுக்கு வராததால் பதறிய அவரது தாய் கோட்டக்குப்பம் காவல் நிலையத்தில் புகார் அளித்ததன் பேரில் போலீசார் ராகவனை தேடி வந்தனர். அப்போதுதான் சம்பவம் நடந்த இடத்தில் ஏதோ மனித உடல் எரிவதாக போலீசாருக்கு தகவல் கிடைத்தது. அங்கு சென்ற போலீசார் எறிந்த உடலை கைப்பற்றி பிரேத பரிசோதனை நடத்த அரசு மருத்துவமனைக்கு அனுப்பி வைத்தனர்.

பின்னர் விசாரணையில் அது ராகவனின் உடல் என்றும், அருணாவின் சகோதரர் மற்றும் அவரது தாய் மாமன் இருவரும்தான் ராகவனை வெட்டிக்கொலை செய்துவிட்டு உடலை எரித்த சம்பவம் வெளிச்சத்துக்கு வந்தது. இதுகுறித்து கொலை வழக்கை பதிவு செய்த போலீசார் அருணாவின் சகோதரர், தாய் மாமன் குட்டை ரமேஷ் உள்ளிட்ட 6 பேரை தேடி வருகின்றனர்.