பாலிவுட் சினிமாவில் பிரபலமான நடிகராக திகழ்பவர் சஞ்சய் தத். கேஜிஎப் இரண்டாம் பாகத்தில் மிரட்டலான வில்லனாக நடித்து அதகளம் செய்திருந்த சஞ்சய் தத், அடுத்ததாக விஜய்யின் ‘லியோ’ படத்தில் நடிக்கிறார். இந்நிலையில் நடிகர் சஞ்சய் தத் படப்பிடிப்பு தளத்தில் ஏற்பட்ட விபத்தில் காயமடைந்துள்ளதாக வெளியாகியுள்ள தகவல் ரசிகர்கள் மத்தியில் அதிர்ச்சியை ஏற்படுத்தியுள்ளது.

பிரேம் இயக்கத்தில் துருவா சர்ஜா நடிப்பில் கன்னடத்தில் உருவாகி வரும் ‘கேடி’ படப்பிடிப்பு பெங்களூரில் உள்ள மகடி சாலையில் படமாக்கப்பட்டு வந்துள்ளது. அப்போது ஹீரோ துருவாவுக்கும், சஞ்சய் தத்துக்கு இடையேயான அதிரடியான சண்டை காட்சி படமாக்கப்பட்டு வந்துள்ளது.

இந்த சண்டை காட்சியின் போது டம்மி குண்டுகள் பயன்படுத்தப்பட்டதாக கூறப்படுகிறது. அந்த சமயத்தில் டம்மி குண்டுகள் எதிர்பாராத விதமாக வெடித்ததில் சஞ்சய் தத்துக்கு காயம் ஏற்பட்டுள்ளதாக தகவல்கள் வெளியாகியுள்ளன. டம்மி குண்டுகள் சற்று வீரியத்துடன் வெடித்த போது சஞ்சய் தத் அருகிலே இருந்துள்ளார். இதனால் அவருக்கு பலத்த காயம் ஏற்பட்டுள்ளதாக கூறப்படுகிறது.

இது சம்பந்தமாக வெளியாகியுள்ள தகவலின்படி, சஞ்சய் தத்துக்கு கை, முழங்கை பகுதிகளில் காயம் ஏற்பட்டுள்ளதாக கூறப்படுகிறது. இதனையடுத்து அவருக்கு முதலுதவி அளிக்கப்பட்டு மேல் சிகிச்சைக்காக தனியார் மருத்துவமனையில் அனுமதிக்கப்பட்டுள்ளார். இந்த சம்பவம் தொடர்பாக KD படக்குழு தரப்பிலிருந்து இதுவரை எந்த விளக்கமும் அளிக்கப்படவில்லை.

KD படத்தில் துருவா சர்ஜா, ஷில்பா ஷெட்டி, சஞ்சய் தத் உள்ளிட்டோர் முக்கிய கதாபாத்திரத்தில் நடிக்கினறனர். ‘லியோ’ படத்தில் சஞ்சய் தத் சம்பந்தமான காட்சிகள் காஷ்மீரில் படமாக்கப்பட்டது. லோகேஷ் கனகராஜ் இயக்கத்தில் விஜய் நடிக்கும் ‘லியோ’ படத்தின் காஷ்மீர் படப்பிடிப்பு அண்மையில் முழுமையாக நிறைவடைந்தது குறிப்பிடத்தக்கது.