தமிழகம் மற்றும் புதுச்சேரியில் 2021-22-ம் கல்வியாண்டுக்கான 11-ம் வகுப்பு பொதுத்தேர்வு கடந்த மே மாதம் நடத்தப்பட்டது. மொத்தம் 8,83,882 பேர் தேர்வை எழுதினர். இதில் மாணவர்கள் 4,33,684 பேரும், மாணவிகள் 4,50,198 பேர் பங்கேற்றனர். இந்த பொதுத்தேர்வு முடிவுகள் இன்று காலை 10 மணிக்கு வெளியிடப்படுகிறது. www.tnresults.nic.in, www.dge.tn.gov.in என்ற இணையதளங்களில் தேர்வு முடிவுகள் வெளியாகின்றன.

இந்த இணையதளங்களில் மாணவ, மாணவிகள் தங்களுடைய பதிவெண் மற்றும் பிறந்த தேதி ஆகியவற்றை பதிவு செய்து தேர்வு முடிவுகளை அறிந்து கொள்ளலாம். 11-ம் வகுப்பு மாணவ-மாணவிகள் பள்ளிகளில் சமர்ப்பித்த உறுதிமொழி படிவத்தில் குறிப்பிட்டுள்ள செல்போன் எண்ணுக்கும், தனித்தேர்வர்கள் ஆன்லைன் விண்ணப்பப்பதிவில் குறிப்பிட்ட செல்போன் எண்ணுக்கும் குறுஞ்செய்தி வாயிலாக தேர்வு முடிவுகள் அனுப்பப்படும் என்று அரசு தேர்வுகள் இயக்ககம் தெரிவித்துள்ளது.

இதனிடையே, இந்த தேர்வில் தோல்வி அடையும் 11 ஆம் வகுப்பு மாணவர்கள் 12ம் வகுப்புக்கு தேர்ச்சி பெறுவார்கள் என்றும், தோல்வி அடைந்த பாடங்களை அடுத்து நடைபெறும் சிறப்பு தேர்வில் எழுதி தேர்ச்சி பெற வேண்டும் என்றும் கூறப்பட்டுள்ளது.